NVE sin oppsummering av kraftsituasjonen i veke 20, 2023

Varmare vêr og mykje uregulerbar kraftproduksjon gav låge kraftprisar
Ved utgangen av veke 20 auka fyllingsgraden i magasina i Noreg til 34,1 prosent. Det er 3,5 prosentpoeng lågare enn medianverden for veka. På grunn av mykje snøsmelting har det kome meir tilsig til vasskraftmagasina enn gjennomsnittet dei siste to vekene. Det er venta at dette vil halde fram i inneverande veke.

Høgare temperaturar og fleire fridagar bidrog til lågare forbruk i Norden førre veke. Total kraftproduksjon i Noreg gjekk også ned, og det var spesielt den regulerbare vasskrafta som minka.

Det låge forbruket, auka tilsig og høg kraftproduksjon frå sol- og vindkraft bidrog til ein stor nedgang i kraftprisane. Natt til onsdag var kraftprisane negative i deler av Norden, og i helga var det negative timeprisar både i Norden og på kontinentet. På dagtid søndag var prisane heilt nede i -5,9 øre/kWh i alle dei norske prisområda.

Vêr og hydrologi
I veke 20 var temperaturen 0 – 2 grader over vekegjennomsnittet for dei siste 20 åra i heile landet. For veke 21 er det venta temperaturar som er omkring vekegjennomsnittet for Aust- og Sørlandet og 2 – 3 grader under vekegjennomsnittet i resten av landet.

For veke 20 er berekna tilsig 8,1 TWh, som er om lag 160 prosent av vekegjennomsnittet. I veke 21 er det venta eit tilsig på 8,2 TWh, eller om lag 140 prosent av vekegjennomsnittet.

NVE - kraftsituasjonen