Open og ansvarleg drift - Fitjar Kraftlag SA
Openheitslova
Openheitslova trådde i kraft 1. juli 2022. Føremålet med lova er å setje fokus på og å fremja verksemder si respekt for grunnleggjande menneskerettigheiter og anstendige arbeidsforhold i forbindelse med produksjon og levering av varar eller tenester. Lova skal og sørgje for at informasjon om korleis verksemdene handterer eventuelle konsekvensar vert offentleggjort.
Større verksemder
Fitjar Kraftlag er i utgangspunktet ikkje omfatta av openheitslova. Dette skuldast at me ikkje vert rekna som ei større verksemd. To-årsregelen i rekneskapsloven § 1-6 andre og tredje ledd om små føretak gjeld tilsvarande for openheitslova, noko som inneber at resultata frå årsrekneskapen er nøydd for å samsvare med definisjonen for større verksemder to år på rad.
Grunna svært høge kraftprisar steig salsinntektene frå rett over 39 millionar kroner i 2021 til rett over 93 millionar kroner i 2022. Det førte til at årsrekneskapen til Kraftlaget i frå 2022 overskrid definisjonsgrensene i openheitslova, medan årsrekneskapen i frå 2021 er innanfor grensene. Som fylgje av to-årsregelen vil selskapet følgeleg ikkje vere omfatta av openheitslova.
Fitjar Kraftlag SA
Fitjar Kraftlag ynskjer å vise at me støttar opp om arbeidet med menneskerettigheiter og anstendig arbeid for alle, sjølv om me ikkje er direkte omfatta av openheitslova. Me ser på eit slikt arbeid som eit felles samfunnsansvar, og vil bidra med det me kan både i forhold til førebygging og eventuelt iverksetjing av tiltak.
Fitjar Kraftlag SA er eit samvirkelag, som er eigd av medlemane i selskapet. Alle kundar som er busette i, har eigedom i, eller har registrert forretningsadresse innanfor Fitjar kommune og delvis Stord- og Bømlo kommune kan verta medlem. Styret og administrasjonen har stort fokus på medlemskap, og jobbar aktivt med å få nye medlemmar inn i Kraftlaget.
I tillegg til at me har produksjon frå to små vannkraftverk leverer Fitjar Kraftlag både straum og breiband, samt elbilladar til kundar. Me opererer hovudsakeleg i straummarknaden, og den største leverandøren vår er Kinect Energy Spot AS.
Leverandørutvikling og samarbeid
Fitjar Kraftlag ynskjer å jobbe aktivt for å leggja til rette for eit godt samarbeid med leverandørane våre, slik at me saman kan arbeida for å sikra ei positiv utvikling for menneske, samfunn og miljø i leverandørkjeda. Dialog, tillit og respekt mellom Fitjar Kraftlag og våre leverandørar meiner me er sentrale nøkkelord i forhold til at ein skal kunne utvikle samarbeidet i ei slik ynskja positiv retning. Me ynskjer sterke og langvarige leverandørforhold.
Lokale leverandørar
Fitjar Kraftlag nyttar seg i stor grad av lokale leverandørar me kjenner godt til. Dette er leverandørar som er av høg kvalitet og som visar god samarbeidsevne. Ved å handle lokalt er me i større grad kjende med leverandørane og måten dei arbeidar på.
Kinect Energy Spot AS
Kinect Energy Spot AS er den største leverandøren vår. Selskapet vart stifta i 1996, og ligg i toppen over verksemder som driv handel med elektrisitet i Noreg. I forhold til at dette er vår største leverandør, har me mellom anna innhenta deira interne retningslinjer. Fitjar Kraftlag ynskjer å sikra seg at Kinect som vår leverandør, har klare retningslinjer for sine leverandørar igjen, slik at ein sikrar ein berekraftig forretningspraksis også lenger ut i leverandørkjeda. Me har tru på at interne krav til retningslinjer mellom verksemdene og leverandørane vil bidra til ei styrkja felles forståing, samt leggje til rette for eit godt samarbeid i forhold til arbeidet med å sikra anstendig arbeid for alle og å motverka brot på menneskerettigheiter.
Styret i Fitjar Kraftlag
Styret i Fitjar Kraftlag består av fire medlemmar som er valde av årsmøtet. Saman med dagleg leiar har styret eit overordna ansvar for drifta av Kraftlaget. Styret har jamlege styremøte, der ein mellom anna får orientering om drifta og ein har gjennomgang av strategi.
Framover vil etikk og berekraft få eit større fokus i selskapet. Det overordna ansvaret til styret gjer det naturleg å inkludere at drifta skal vere i tråd med gjeldande regelverk og normer for berekraftig forretningspraksis.
Fitjar, 22. juni 2023
Therese Nysæther Agnar Aarskog
Dagleg leiar Styreleiar
